Grupo sang mga negosyante, ginakabalak-an ang bag-o nga taripa sang U.S sa mga produkto sang Pilipinas

Ginakabalak-an sang Philippine Chamber of Commerce and Industry (PCCI) ang bag-o nga 12. 5 percent nga taripa ukon dugang nga buwis nga ginpatuman sang Estados Unidos sa pila ka mga produkto sang Pilipinas.

Suno kay PCCI Chairman George Barcelon, mahimo nga magtaas ang presyo sang produkto sang Pilipinas sa U.S market tungod sa dugang nga buwis.

Bangud sini posible nga magresulta sa mas manubo nga benta para sa mga lokal nga exporter nga maka-apekto sa pila ka mga negosyo kag trabaho sa pungsod.

Nagalaom ang PCCI nga makapakig-estorya ang Department of Trade and Industry (DTI) sa gobyerno sang Estados Unidos agud mapanubo ukon makuha ang bag-o nga taripa.