Ginsumiter ang isa ka hagna sa Kamara agud siguruhon ang 20 porsyento nga diskwento para sa mga senior citizen kag persons with disabilities (PWDs), subong man ang exemption halin sa 12 porsyento nga Value Added Tax (VAT), ang mahimo nga ma-apply sa mga promo offers sang mga negosyo.
Ang House Bill 16, nga ginpangunahan nanday House Speaker Martin Romualdez, Tingog Party-list Representatives Andrew Romualdez, kag Rep. Jude Acidre, ang gin-file sang Lunes, Hunyo 30. Ang hagna ginatawag nga “An Act Enhancing the Discount on the Purchase of Goods and Services of Senior Citizens and Persons with Disabilities.”
Suno kay Romualdez, tinutuyo sang hagna nga ang mga baisay sa tunga sang mga negosyo kag sang mga senior citizens kag PWDs kaangot sa nagakadapat nga interpretasyon sang mga naga-eksister nga layi.
Sa isa ka pahayag, ginsiling ni Romualdez nga ang nasambit nga hagna ang may katuyuan nga mapabilin ang espesyal nga pagtratar sa mga senior citizens kag persons with disabilities pamaagi sang pag-angkon sang isa ka gintingub nga approach agud mas madali nga makuha ang mga programa kag serbisyo nga kinahanglanon.
Pila sa mga ginaduso nga hagna nga kapareho sini amo ang House Bill 9850 sang ika-19 nga Kongreso, nga nagasiguro nga ang 20 porsyento nga diskwento kag Value Added Tax exemption ang sa gihapon magadayon apisar pa nga may mga promotional discount rates, kasubong sang sa domestic sea kag air transport services, mga hotel, mga restawran, kag pati man sa mga bill sang tubig kag kuryente.
Nakapending pa sa gihapon ang nasambit nga hagna sa komite tubtuob sa katapusan sang ika-19 nga Kongreso.
Ang pag-file sang House Bill 16 nagapakita sang patuloy nga pagsuporta sa mga tikang nga magahatag sang mas mamag-an kag mas maayos nga kalidad sang pagpangabuhi para sa mga senior citizens kag PWDs sa pungsod.
