ROXAS CITY, CAPIZ – Naglab-ot na sa anom ang kumpirmado nga napatay kag isa ang nagapabilin nga missing sa Western Visayas bangud sa tuman nga epekto sang habagat nga ginpabaskog sang bagyo nga “Crising,” “Dante,” kag “Emong” sadtong nakaligad nga bulan.
Sa interview sang Bombo Radyo Roxas kay Office of Civil Defense Region 6 Director Raul Fernandez, naglab-ot na sa ₱329.4 million ang kabug-usan nga halit sa imprastruktura kag agrikultura sa rehiyon.
Sa breakdown sang report: ₱175.5 million ang halit sa mga imprastruktura kasubong sang mga tulay, karsada, flood control systems, kag mga pampubliko nga pasilidad.
₱156.9 million naman ang nabalhag nga halit sa sektor sang agrikultura, partikular sa mga pananom, palaisdaan, kag mga kagamitan sang mga mangunguma kag mangingisda.
Kalakip sa mga probinsya nga tuman nga naapektuhan amo ang Iloilo, Capiz, Aklan, Antique, kag Guimaras. Sa Iloilo City, duha ka biktima ang nalumos – isa ka 14-anyos nga solterito sa Buntatala Creek kag isa ka 22-anyos nga lalaki sa Molo District.
Sa Iloilo province, isa ka mangingisda ang nalumos samtang ginakaayo sini ang ila nga bangka kag nakit-an ang iya nga bangkay sa baybayon sang syudad.
Sa Aklan, isa man ka lalaki ang napatay matapos naanod sa suba sa banwa sang Tangalan.
Samtang isa pa ka lalaki sa Santa Barbara, Iloilo ang na-report nga nalumos apang ginaipadalom pa sa beripikasyon sang RDRRMC.
Samtang isa pa ka lalaki ang padayon nga ginapangita sa banwa sang Sebaste, Antique matapos gin-anod sang mabaskog nga current sang tubig masobra duha ka semana na ang nakaligad.
Sa Guimaras, duha ka mangingisda ang naluwas mataposnagkulod ang ila nga bangka sa baybayon sang Sibunag.
– Interviewed by: Bombo Francis Biñas
