ROXAS CITY – Dako ang pagpasalamat sang pila ka mga kooperatiba kag asosasyon sang mga mangunguma sa Capiz, sa nabaton nga 20 ka unit sang combined harvesters sa ginpatigayon nga Provincial turnover and Agricultural Machinery Distribution sa idalom sang Rice Competitiveness Enhancement Fund (RCEF) mechanization program sang Department of Agriculture, sa atubang sang kapitolyo probinsyal.
Sa interview sang Bombo Radyo kay Mr. Manuelito Fria, bise presidente sang Cabalbat Irrigators Association, Inc., sa Barangay Calaagus, banwa sang Mambusao, ginsiling sini nga bentaha ang kaangay sini nga makinarya sa ila nga pagpanguma agud mapadasig ang ila pagtrabaho.
Dugang pa sini, nga makatipid sila sa tiyempo kag indi na sila magrenta pa sang makinarya sang iban, kag sa ulihi, mahimo man nila nga maparentahan ang amu nga harvester kun kinahanglan agud makadugang sang income sa ila asosasyon.
Ang mga kwalipikado nga kooperatiba kag asosasyon sang mangunguma nga nakabaton sang nasambit nga makinarya ang mga masunod:
1. Indayagan Farmers Association sa banwa sang Maayon
2. Calitan Multi-Purpose Cooperative sang Panay
3. Cabangahan Farmers Association
4. Pasugue Community Farmers Association
5. Tabuc Norte Farmers Irrigators Association Inc., sa banwa sang Panitan
6. Tabuc Farmers Association sang Pontevedra
7. Barangay Adlawan Farmers Association
8. Bago Farmers Association sa syudad sang Roxas
9. Barangay Angub Farmers Association sa Cuartero
10. Nasunogan Farmers Association sa Dao
11. Agraca Agrarian Reform Cooperative
12. Consolacion Farmers and Irrigators Multi-Purpose Cooperative sa banwa sang Dumalag
13. Astorga Farmers Association
14. Nagsulang Farmers Association sa Dumarao
15. Bubbles Farmers Association
16. Cabalbat Irrigators Association, Inc., sa Mambusao
17. Majanlud Farmers and Fisher folks Association sa Sapian
18. Balucuan Farmers Association sa Sigma
19. SJPAF Irrigator’s Association Inc. kag
20. Samahang Magbubukid sang San Nicolas Farmers Association sa banwa sang Tapaz.
Gintambungan ang amu nga aktibidad sang nagkalain-lain nga alkalde sang nasambit nga mga kabanwahanan nga ginpangunahan ni Gobernador Fredenil Castro, Bise Gobernador James Magbanua kag mga board members.
Nahibaluan nga nagbalor sa P1,750,000 ang kada isa ka unit sang harvester kag may kabug-osan nga pondo nga nagalab-ot sa P35,000,000.
