Nagpahanumdom ang isa ka health expert sa importansya sang temprano nga pagbulong sa balatian nga Tuberculosis.
Sa interview sang Bombo Radyo kay Dr. Mark Anthony Basquez, Officer in Charge sang Sen. Gerardo M. Roxas Memorial District Hospital, iya ginpahayag nga ang TB isa ka seryoso nga sakit nga nagaapekto sa baga kag madali nga makalaton, gani ginahatagan ini sang daku nga importansya sa komunidad.
Suno kay Basquez, ang mga sintomas sang TB amo ang malawig nga ubo nga nagasobra sa duha ka semana, hilanat, pagnubo sang bug-at kag masami nga ginakapoy.
Ang TB ang mahimo makalaton pinaagi sa hangin halin sa tawo nga nagaubo ukon nagabahing nga mas mataas ang risgo sa mga may maluya nga resistensya pareho sang tigulang, kabataan kag iban pa nga may sakit.
Pahayag pa niya, mahimo nga malikawan ang nasambit nga balatian paagi sa husto nga pagbulong, pagtakop sang baba kun nagaubo kag paglikaw sa madamo nga tawo kon may sakit.
Dugang pa sini, ang pagbulong sa TB pinaagi sa DOTS Center ang kinahanglan nga sundon sa sulod sang pila ka bulan kag importante gid nga tapuson ini agud malikawan ang paglala sang kondisyon ukon pagbalik sang sakit.
Nagpanawagan man ang natungdan nga indi dapat pag-ikahuya ang pag-angkon sang sakit nga TB bangod ini nga sakit ang mahimo gid nga mabulong kun hatagan sang husto nga Medical Attention.
