ROXAS CITY, CAPIZ – Indi kumpormi ang IBON Foundation sa mga nakasulod nga impormasyon nga yara sa ‘Sumbong sa Pangulo’ website.
Ini ang nagaunod sang mga flood control projects sa nagkalain-lain nga mga lugar sa Pilipinas humalin sang tuig 2022 tubtob 2025.
Sa interview sang Bombo Radyo kay Sonny Africa, Executive Director sang IBON Foundation, iya ginpahayag nga indi uploaded ang tanan nga dokumento nga kinahanglan makit-an sang publiko nahangungod sa mga proyekto.
Ginkwestyon sang institusyon ang pondo nga gindeklara sang Department of Public Works and Highways nga P540 billion base sa mga proyekto nga nalakip sa ‘Sumbong sa Pangulo’ website.
Suno kay Africa, madamo sang mga proyekto nga wala malakip sa nasambit nga website nga daw kaangay nga may yara sang ginatago ang gobyerno.
Bangud base sa ila pagpangusisa, P1.2 trillion ang balor sang tanan nga proyekto humalin sang 2022 tubtob subong nga tuig.
Nagakabalaka ang IBON Foundation nga posible ginpili lang ang mga proyekto nga ilakip sa ‘Sumbong sa Pangulo’ website.
Dugang pa sang natungdan, kinahanglan may nakabutang man nga distrito sa kada proyekto, evaluation report, project appraisal, engineering design, detailed project kag Commission on Audit reports.
