Gin-grant sang International Criminal Court (ICC) ang request sang depensa nga indi magtambong sa status conference si former President Duterte nga natalana sa Mayo 27 may kaangtanan sa kaso nga crimes against humanity.
Suno sa ICC Trial Chamber III, ginpahayag nga dapat magsumite ang depensa sang pirmado nga written request ni Duterte tubtub sa Mayo 25 bangud sa iya indi pagtambong sa hearing.
Pahayag pa sang korte, ang status conference magahambal nahanungod sa petsa sang trial, mga deadline, expected evidence, agreed facts, kag lenguahe nga gamiton sa kaso.
Dugang pa sang ICC nga mangin publiko ang hearing apang mahimo man nga magpatigayon sang private sessions para sa mga sensitibo nga isyu kaangay sang witness protection kag security concerns.
Una na nga ginkumpirma sang ICC ang mga panumbungon batuk kay Duterte may kaangtanan sa ginaalegar crimes against humanity sa war on drugs, matapos man nga ginbasura ang apela sini sa jurisdiction sang korte.
