Ginalauman nga tambungan sang madamo nga tagasuporta ang patigayunon nga inauguration ni President-elect Donald Trump sa Lunes, Enero 20, 2025.
Mahibaluan nga patigayunon ang inagurasyon sa sulod sang U.S Capitol ini bangud sa Arctic blast ukon tuman nga lamig sa pungsod.
Ini man ang labing una nga tion sa sulod sang 40 ka tuig.
Sa pagpakig-angut sang Bombo Radyo sa Bombo International Correspondent direkta sa Estados Unidos nga si Mr. Arthur Pequirda Bulacan, ginpahayag sini nga mahimo nga maglantaw sang seremonya ang mga tagasuporta ni Trump sa mga screen sa sulod sang Capital One Arena kung sa diin sarang nga maka-accomodate sang masobra 20,000.00 nga mga indibidwal.
Suno diri, ginalauman nga ang lakat sang tyempo sa adlaw sang inagurasyon yara sa 19°F (minus 7°C) apang ang hangin ang magapalamig.
Kadungan sang inagurasyon ni Trump ang holiday sa Estados Unidos kung sa diin ini ang adlaw sa pagdumdum sang Martin Luther King Jr. Day.
Samtang nagapati naman si Bulacan nga sa idul-ong nga mensahe sang bag-o nga lider, iya panindugan ang anu man nga promisa nga iya isambit sa bilog nga Amerika.
