ROXAS CITY – Ginakabig sang Highway Patrol Group (HPG) Capiz nga isa ka epektibo nga lihok ang ginpatigayon nila nga inspeksiyon kaupod ang Roxas City PNP, Criminal Investigation ang Detection Group ukon CIDG, Capiz Provincial Crime Laboratory, Capiz Police Provincial Office kag City Licensing Office sa mga junkshop kag motorcycle and repair shops sang mga salakyan nga naga-operate sa siyudad sang Roxas.
Ini ang ginpahayag ni HPG-Capiz Provincial Officer PCapt. Peter Bergonio sang mainterview sang Bombo Radyo.
Ang nasambit nga lihok ang kasunod sang madata nga kaso sang motornapping nga narekord diri sa siyudad sang Roxas kag probinsya sang Capiz.
Ginhimo ini agud matumod ang mga motorcycle kag repaire shop nga naga-operate kun bala nagabaligya kag nagabakal ini sang kinawatan nga mga motorsiklo.
Gintsekyar man sang mga otoridad ang plaka sang mga motorsiklo pinaagi sa ila nga database.
Gintsekyar man nila ang mga motorparts nga ginabaligya sang nasambit nga mga shop.
Magluwas diri, ginpangitaan man ini sang license permit sang City Licensing Office kun legal ang operasyon kag kun may yara sang business permit ang nasambit nga mga shops.
