Gin-reject sang International Criminal Court (ICC) ang hingyo ni anay Presidente Rodrigo Duterte para sa temporaryo nga kahilwayan samtang ginahearing ang mga kaso batuk sa iya.
Suno sa Pre-Trial Chamber I sang ICC, nagapabilin nga kinahanglanon ang iya pagkapreso suno sa mga probisyon sang Rome Statute.
Sa desisyon sang korte, ginhatagan pagtamod nga makatarunganon ang padayon nga pagkabilanggo kay Duterte base sa kabug-aton sang mga akusasyon, kinahanglanon nga masiguro nga magapangatubang ini sa pag-hearing, kag malikawan ang posible nga pagpasilabot sa imbestigasyon ukon pagpamahog sa mga biktima kag saksi.
Nahibaluan nga si Duterte ang yara sa kustodiya sang International Criminal Court sa The Hague halin sang Marso 2025, may kaangtanan sa tatlo ka kaso sang pagpatay nga ginakabig “crimes against humanity” bangud sang iya kontrobersyal nga kampanya kontra droga sa tion sang iya administrasyon.
Matandaan nga sang Hunyo, ang iya kampo nag-file sang petisyon para sa temporaryo nga kahilwayan, nga nagasambit sang mga rason pareho sang ginaalegar nga indi maayo nga panglawas kag kakulangan sang ikasarang sa pagtindog sa hearing.
Ginpahayag man sang iya mga abogado nga wala nagapamatuk ang subong nga administrasyon sa iya temporaryo nga kahilwayan, butang nga sang ulihi ginpanginwala sang Malacañang.
