ROXAS CITY – Totally-burned ang isa ka balay sa Sunrise Urban, Barangay Milibili, Roxas City.
Ang nasambit nga balay ang ginapanag-iyahan ni William Vito Estallo, 68 anyos.
Base sa inisyal nga impormasyon nga nakuha sang Bombo Radyo, sa kwarto naghalin ang kalayo nga madasig nga naglapta sa bilog nga balay.
Suno kay Estallo, nakit-an sini nga nasunog ang foam sa sulod sang hulot sang iya anak kag napaslawan na sila nga mapalong pa ini.
Ginpahayag pa sini nga gintinguhaan niya nga basyahan sang tubig ang kalayo apang bangud dako na ang kalayo, wala gid ini mapalong.
Wala gid sang nasalbar nga mga kagamitan ang pamilya kag madamo sila sang appliances nga nagkalasunog kapareho sang TV, refrigerator, aircon, mga furnitures kag iban pa.
Suno sa pamilya Estallo, kapin sa 1.5 milyones pesos ang kahalitan nga natuga sang sunog bangud madamo sila sang appliances kag furniture nga nasunog.
Padayon naman nga gina-imbestigahan sang Bureau of Fire Protection ang insidente agud matumod ang gintunaan sang kalayo.
