Patay ang isa ka lalaki matapos ginpulihan luthang kag labo sa Sitio Proper, Barangay Pasol-o, Jamindan, Capiz.
Ginkilala ang biktima kay alyas “Henry”, 56-anyos, samtang ang ginatudlo naman nga mga suspetsado ang ginkilala nga sanday alyas “Jun” kag alyas “Jolan”, mag-bayaw nga lunsay mga residente sang nasambit nga lugar.
Sa nakuha nga impormasyon sang Bombo Radyo sa lugar, suno kay Kagawad Edwardo Valdemar, suno diri nga lunsay yara sa impluwensya sang makahulubog nga ilimnon ang mga persona nga imbolbado sa nasambit nga insidente.
Ginapahayag nga nagaluyaw ang mga suspek papauli nga kun sa diin ginsundan man ini sila sang biktima kag wala nagdugay nagpang-abot na ang mga ini sa lapit sang balay sang suspetsado.
Wala man suno diri sang record ang nasambit nga mga persona bangud mga pangayaw lang man ini sang amo nga lugar. Suno sa mga nakakita, duha ang ginatudlo nga suspek sa nagluntad nga insidente.
Samtang, suno naman sa pahayag sang himata sang biktima kag suspek nga si alyas “Wil”, may nabatian ini nga isa ka lupok sang armas-luthang sa porsyon nga ginatindugan sa.
Sang ginpadulungan ni Wil ang lugar, nasapwan nalang sini ang biktima nga buhi pa apang, sang nakita ini sang suspek pati sya mismo gintayaan man sang sang ginahawiran sini nga armas.
Nagpalagyo si Wil sa lugar kag gilayon nga nagreport sa mga otoridad, sang nagbalik na ini nasapwan nalang sini ang biktima nga wala na sang kabuhi nga may igo sang pagpanglabo sa tiyan, liog kag iban pa nga parte sang lawas sini.
Madasig naman nga nakapalagyo ang nasambit nga mga suspetsado matapos nakumiter ang krimen.
Narekober naman sa lugar ang binangon nga ginapanag-iyahan sang biktima.
Sa karon, nagapatigayon na sang hot pursuit operation ang kapulisan sang Jamindan MPS kag nagapadayon pa ang maid-id nga imbestigasyon sang mga ini angut sa nasambit nga insidente.
