PILAR, CAPIZ – Isa patay, isa pilason sang aksidente nga mabungguan sang trak ang isa ka motorsiklo sa Barangay Sta. Fe, Pilar, Capiz.
Ginkilala ang napatay nga biktima nga si Lino Borbon, 19 anyos, driver sang motorsiklo samtang napilasan man ang backrider sini nga si Fred Alonzo, 18 anyos, lunsay mga residente sang Barangay San Esteban sang nasambit man nga banwa.
Sa interview sang Bombo Radyo kay Police Corporal Herbert Dela Vega, imbestigador sang Pilar Municipal Police Station, samtang ginasubay sang driver sang ten-wheeler truck nga si Benjie Subiage, 39 anyos sang Barangay Carmencita, President Roxas ang nasambit nga dalanon, hinali na lamang nga nagliko ang motorsiklo sang mga biktima rason nga ini ang nabungguan.
Natumba sa dalan ang motorsiklo kag lunsay tumampilak sa dalan ang duha ka sakay sini kun sa diin diutayan pa nga malapakan sang unahan nga karito sang trak ang ulo sang napatay nga si Borbon.
Nag-angkon sang mga patal nga pilas sa magkatuhay nga parte sang lawas si Borbon nga gintunaan sang iya kamatayon samtang may mga kasamaran man sa lawas si Alonzo nga ginabulong karon sa ospital.
Temporaryo naman nga gin-kustodiya sang Pilar PNP ang driver sang trak para sa nagakaigo nga disposisyon.
