Gin-anunsyo sang Israel ang pagsuspinde sang masobra duha ka dosena nga mga humanitarian organizations nga naga-operate sa Gaza Strip umpisa subong nga tuig bangud sa ginaalegar nga kapaslawan sa pagsunod sa bag-o nga mga pagsulundan sa pagparehistro.
Suno sa Israel, katuyuan sang bag-o nga pagsulundan nga punggan ang Hamas kag iban pa nga militante nga grupo nga makasulod sa mga aid organization.
Kalakip sa mga i-suspend amo ang operasyon sang isa sa pinakadako kag kilala nga international aid groups nga amo ang Doctors Without Borders kag Cooperative for Assistance and Relief Everywhere (CARE).
Apang, ang mga humanitarian organization nagreklamo nahanungod sini. Suno sa ila, indi makatarunganon ang bag-o nga registration rules kag nagapaandam nga ang bag-o nga pagdumili sa pila ka mga aid group ang makaapekto sa mga pumuluyo sang Gaza nga nagakinahanglan sang humanitarian aid.
Sa idalom sang bag-o nga mga pagsulundan nga gin-anunsyo sang Israel sang una nga bahin sang 2025, ginamanduan ang aid organizations nga magparehistro sang mga ngalan sang ila mga empleyado kag maghatag sang mga detalye nga may kaangtanan sa pondo kag sa ila mga operasyon agud nga mapadayon nila ang ila trabaho sa Gaza.
Matandaan, Una nga gin-akusahan sang Israel ang Hamas nga nagakuha sang mga supply sang bulig, isa ka alegasyon nga ginpanginwala sang United Nations kag sang mga aid groups.
