ROXAS CITY – Nagapanindugan si Capiz 1st District Congressman Emmanuel Billones Sr., nga wala sang kamatuoran ang nagalapta nga report nga si anay Department of Interior and Local Government Secretary Mar Roxas ang yara sa likod sang pagtraidor kay anay Presidente Benigno Aquino III.
Sa interview sang Bombo Radyo Roxas kay Congressman Billones, ginpahayag sini nga handa sini pamatud-an nga ginaguba lamang sang mga kritiko ni Roxas ang imahe sang anay interior secretary rason nga ginpalapta ang #NasaanAngPangulo topic nga tuyo paawayon sanday anay Presidente Aquino kag Roxas.
Suno sa kongresista nga kilala sini si Roxas nga disente kag maayo nga tawo nga indi pagtraiduron ang bisan sin-o nga malapit sa iya.
Indi man sini kilala si certain Joyce Ramirez, nga ginasiling ginbayaran ni Roxas para ipalapta ang #NasaanAngPangulo topic, nga ginabasol kay Aquino ang nahinabo sa SAF 44 sa diin nakaguba sa anay presidente.
Nagapati si Billones nga kahimuan ini sang mga akig kay anay interior secretary Roxas, apang kumpyansa nga mapamatud-an sang tanan nga indi butigon kag disente nga tawo ang Capizeño nga si Roxas.
