IVISAN, CAPIZ- Ginpatpat sang hepe ang ivisan Municipal Police Station ang mga accomplishments sang ila nga talatapan sa banwa sang Ivisan, Capiz sa sulod sang isa ka-tuig halin Enero tubtob Disyembre 2024.
Sa interview sang Bombo Radyo kay Police Major Ruby Magallanes, Hepe sang Ivisan Municipal Police Station, iya ginphayag nga isa ka tuig sang pagiging mapisan nga pag-alagad sa komunidad, nangin madinalag-on ang Ivisan Municipal Police Station (MPS) sa pagpatigayon sang mga operasyon kontra sa mga ilegal nga aktibidad sa bilog nga banwa.
Dugang pa sini, nga sa sulod sang tuig 2024, nakarekord ang ila nga talatapan sang syam (9) ka mga operasyon kontra ilegal nga droga kag pulo (10) ka operasyon kontra loose firearms, nga nagresulta sa mga pagka-aresto kag pagkumpiskar sang mga iligal nga gamit.
Subong man, nakarekord man sila sang madinalag-on nga pagkadakop sang dose (12) ka wanted persons, lakip na ang top 1 most wanted person sa munisipyo, nga may mga kaso nga rape kag carnapping. Pinaagi sa mabusisi nga operasyon, napatuman ang layi kag napabilin ang seguridad sa bilog nga banwa.
Wala man ginakalipatan ukon ginabalewala sang Ivisan PNP ang problema sa ilegal nga pagpangisda sa diin nga sa trentay-uno (31) ka mga operasyon, nadakpan ang madamo nga manugpangisda kag nakumpiskar ang ila mga fishing boats kag kagamitan, bilang kabahin man sang pagpaninguha nga maprotektaran ang dunang-manggad kag mapabilin ang katawhay sa baybay.
Liwat, padayon nga ginapalig-on sang Ivisan Municipal Police Station ang pagpatuman sang mga municipal ordinances, labi na ang mga regulasyon sa trapiko. Ang ila mga operasyon nakabulig nga masiguro nga ang mga residente nagasunod sa mga patakaran sang lokal nga gobyerno, nga nagahatag sang mas maayo nga kaayusan sa banwa.
Sa katapusan, ginapalapnag ni Magallanes ang pagbinuligay sang mga pumuluyo kag kapulisan agod mapabilin nga drug-free ang Ivisan. Padayon man ang ila barangay visitation kag regular nga Barangay Assembly agud direkta nga mapalab-ot ang mga kabalaka sang komunidad kag ginsiguro man sini nga ang ila talatapan bukas sa publiko para magpangalagad 24 oras.
Interviewed by Bombo Francis Biñas and Bombo Sunnie Mae Batencila
