ROXAS CITY, CAPIZ – Nagapanawagan ang mga jeepney drivers sa natungdan nga ahensya sang gobyerno nga hatagan sang aksyon ang ila apelar nga pasakaan ang pamasahe, bangud sa padayon nga pagtaas sang presyo sang gatong.
Sa interview sang Bombo Radyo kay alyas Papang, isa ka jeepney driver nga naga-biyahe halin Dumalag pakadto sa Roxas City vice versa, iya ginpahayag nga isa ka daku nga problema para sa ila ang P4.80 kada litro nga pagsaka sa presyo sang diesel.
Suno kay Papang, ang ila inadlaw nga kita, igo lang para sa gatong sang ila jeep kag halos wala na sang nabilin nga kwarta nga mapauli sa ila pamilya.
Dugang pa sang natungdan, masuwerte lang sila kun madamo sang pasahero nga masakay, bangud bisan papaano, may gamay sila nga mahatag nga kwarta sa ila panimalay.
Dugang pa ni Papang, wala gid sang daku nga epekto ang pagbukas sang klase sa ila biyahe, bangud limitado man ang pag-uli sang mga estudyante sa Dumalag kay kadam-an sa ila naga-board na sa syudad kag Biyernes kag Dominggo lang nagapauli.
Nagpanugyan man siya nga kun magapadayon pa ang pagsaka sang presyo sang gatong, daku gid ang posibilidad nga mapiyerdi na sila nga mga drivers kag indi na makaangkon sang insakto nga kita para sa adlaw-adlaw nga ila pangabuhi.
– With a reports from Bombo Jessa Mae Siman De Los Santos
