ROXAS CITY – Ginakabig sang Capizeño sculpture artist nga si John Alaban ang kapareho niya man nga artist nga “endangered species” na ukon masiling niya gamay na lamang sila ang naga- specialize sang nasambit nga sining.
Sa interview sang Bombo Radyo kay Mr. John Alaban, Capizeño Sculpture Artist, suno diri ginabudlayan siya magpangita sang mapasahan sang iya talento sa patag sang eskultura bangud man sa mabudlay ini kag kinahanglan sang maid-id nga pagtuon.
Mahibaluan nga si Alaban ang naghuman sang 5 ka mga higante nga rebulto sang Datu sa Malandog, Antique kag sang pila pa ka mga rebulto nga makit-an sa probinsya sang Capiz kag syudad sang Roxas.
Isa man siya sa nagdesinyo sang Sacred Heart of Jesus, isa ka pinakamataas nga monumento sa Pilipinas nga makit-an sa Barangay Dinginan, Roxas City.
Suno pa kay Alaban Pebrero ini nagsugod sa pag-ubra sang 5 ka mga rebulto sang Datu kag natapos sini lang nga Hulyo kabulig ang iya bata kag gumangkon, kagduwa pa ka mga trabahador, gintuad pa sini nga mabudlay himuon ang rebulto bangud human ini sa konkreto kag salsalon dugang pa nga kinahanglan magresearch sa background sang mga datu agud mahibaluan niya ang mangin estruktura sini.
Sa pihak sini, gina-enjoy niya sa gihapon ang pag-ubra sang mga rebulto bangud bata pa lang siya, nagapinta kag nagadrawing na siya kun sa diin rason man nga nagka-interes sa eskultura kag nakatrabaho pa sadto kay Napoleon Abueva nga isa man ka national artist kag ginakabig “Father of Modern Philippine Sculpture”
Dugang pa ni Alaban, bukas ang iya shop sa bahin sang Arnaldo Blvd. sa luyag magtuon sang sculpture.
