Nagkasa sang hearing ang Senate Committee on Basic Education agud talakayon ang nagalala nga krisis sa edukasyon, partikular sa kakulangan sang mga hulot-klasehan sa pungsod.
Hugot nga ginpahayag ni Senador Bam Aquino, Chairman sang Committee, indi lamang simple nga kakulangan sang classrooms ang problema, kundi konektado ini sa mas daku nga isyu kasubong sang guba kag daan nga pasilidad, nagagulutok nga mga estudyante, kag indi maayo nga sistema sa pagpatukod sang mga eskwelahan.
Base sa datos sang Department of Education (DepEd), kulang ang Pilipinas sang mas ukon menos 165,000 classrooms, apang ginapatihan nga mas mataas pa ang actual nga numero.
Wala pa nalakip diri ang mga classrooms nga madugay na nga wala nakaayo matapos himuon nga evacuation center sang mga nabahaan kag naapektuhan sang linoy kag ang mga classroom nga may double ukon triple shifting sang klase.
Suno man sa report sang Education Commission 2 (EDCOM 2), may 5.1 million nga “aisle learners” ukon mga estudyante nga napilitan nga magpungko sa pasilyo bangud sa kakulangan sang pulungkuan.
Madamo sang upang sa pagpatukod sang mga bag-o nga classrooms, kalakip ang daan kag maid-id nga regulasyon, limitado nga lupa ilabi na sa urban areas, pagka-delay sang pondo, kag isyu sa pagpanag-iya sang duta nga pagatukuran.
Ginpunto man ni Aquino ang daku nga diperensya sa ginabanta nga balor sang pagpatukod sang classrooms. Suno sa DepEd, ₱2.5 million kada classroom, samtang sa datos sang Department of Public Works and Highways (DPWH) ginabanta nga yara sa masobra ₱3.5 million.
Nagakabalaka ang mamalid bangud sadtong 2024, 847 classrooms lamang ang natapos sa bug-os nga pungsod.
Pahayag sang senador, ang sala nga paggamit sang pondo para sa edukasyon indi lamang pagpangawat sa kaban sang gobyerno, kundi pagpatay sa handom sang ka kabataan nga Pilipino.
