ROXAS CITY – Natalana nga pasakaan sang panumbungon nga Act of Lasciviousness ang apat sa lima ka mga lalaki nga ginapahayag yara sa likod sang pag-gang rape sa 16 anyos nga estudyante sa banwa sang Pontevedra, Capiz.
Ini ang ginpahayag ni Police Inspector Edgar Niuda, hepe sang Pontevedra Municipal Police Station sang mainterview sang Bombo Radyo Roxas.
Suno kay Niuda, magluwas sa apat ka mga suspek nga ginalakipan sang tatlo ka mga menor de edad, magapangatubang man sang panumbungon nga Rape ang isa ka lalaki nga una nga naghimulos sa biktima nga si alyas Marie.
Matandaan nga una na nga ginpahayag sang biktima nga ginhimuslan ini sang apat ka mga lalaki makaligad nga nahubog ini gikan sa iya gintambungan nga birthday party.
Apang ginpanginwala ini sang mga suspek kag gin-aku nga ila lamang gin-uyatan ang pila ka mga pribado nga parte sang lawas sang biktima.
Sa ulihi, ginbuyagyag ni Marie nga didto pa lamang sa birthday party, ginhimuslan na ini sang mismo celebrant nga ginapahayag anak sang isa ka barangay kagawad.
