Nagdangat sa kapin 3,000 nga concerns sang mga estudyante ang nasabat sang Department of Education (DepEd) pinaagi sa DepEd ‘TeleSafe’ hotline.
Ang nasambit nga helpline ang ginlunsyar sadtong tuig 2022, kadungan ini sang pagpungko sadto ni outgoing Education Secretary kag Vice President Sara Duterte.
Sa idalom sang Learners TeleSafe Contact Center Helpline, nahimo sang DepEd nga mapamatian ang nagkalain-lain nga mga concerns nga gin-apelar sa ila kasubong sang bullying, verbal abuse, harassment, kag iban pa.
Samtang, ginpasalig naman ni VP Sara nga ang pagprotektar sa kaayuhan sang mga estudyante ang magapabilin nga top priority sang nasambit nga departamento.
Gintalupangud man sang outgoing secretary nga importante ang gilayon kag epektibo nga pagsabat sa mga concerns sang mga estudyante sa bilog nga pungsod.
Sa idalom sang pagpamuno ni Vice President Sara, gintukod ang Learners Rights and Protection Office (LRPO) sa idalom sang DepEd. Ini ang isa ka unit nga nagaprotektar sa kinamatarong sang mga estudyante.
