Naglab-ot na sa 96.49% ang mga barangay sa Western Visayas nga wala na sang problema sa iligal nga droga.
Ini matapos ang deliberasyon sang Regional Oversight Committee; nga nagdugang sang apat ka barangay nga gin-deklara nga drug-cleared. Ang mga barangay nga ini amo ang Brgy. Timpas sa Panitan, Capiz; Brgy. Bayuyan sa Estancia, Iloilo; kag Brgy. Yulo Drive Arevalo kag Brgy. Katilingban sa Molo, Iloilo City.
Base sa Dangerous Drugs Board, ini nga mga barangay ang wala na sang problema sa iligal nga droga matapos madakop na ang mga nagaduso sang iligal nga droga kag napaidalom na sa rehabilitasyon ang mga drug users.
Suno sa datos sang Philippine Drug Enforcement Agency (PDEA) Region 6, sa kabug-usan nga 3,389 ka barangay sa rehiyon, 3,270 sini ang gindeklarar nga drug-cleared na. Ini nagapakita nga daku ang nabuhat sang mga law enforcement agencies, lokal nga gobyerno, kag mga komunidad sa pagsolbar sang problema sang illegal nga droga.
Sa karon, 119 ka barangay na lang sa Western Visayas ang apektado pa sang iligal nga droga kag padayon pa ang suporta kag trabaho sang mga kapulisan, lokal nga gobyerno kag iban pa agud masolbar ang problema sang illegal nga droga sa bilog nga Western Visayas.
