Nagapabilin nga importante tubtob subong ang peaceful approach sa reporma ni Dr. Jose Rizal sa pag-address sa mga isyu nga ginapangatubang sang Pilipinas.
Sa interview sang Bombo Radyo kay Dr. Rey Carlo Gonzales, isa ka historian, iya ginpahayag nga isa sa mga natun-an kay Rizal amo nga ang kinagamo ang indi makabig nga ‘best solution’.
Ini ang ginakabig nga ‘band-aid solution’ kag wala sini ginasolbar ang ugat sang problema.
Suno kay Gonzales, ang ika-duha nga natun-an halin sa nasambit nga baganihan amo ang paghimo sang reporma sa insakto nga pamaagi.
Buot silingon, pag-acknowledge sang problema kag pagpangita sang solusyon.
Ang ini nga approach ni Rizal, ang nagalain sa iya sa iban nga revolutionaries sang tion sini apisar nga madamo sang wala nagpabor sa iya nga mga ideya.
Pahayag ni Gonzales, may mga rason man ang mga tawo sa kagustohan nga magpatigayon sang revolution apang para kay Rizal, indi pa handa ang Pilipinas bangud sa kakulang sang pondo kag resources.
Subong nga ika-129 ka tuig nga pagkapatay ni Dr. Rizal, madamo sang mga issue kaangay sang kurapsyon kag pag-abusar sang gahom ang pungsod sadto kag tubtob subong, ini ang nagapabilin nga problema sa gihapon sa Pilipinas.
