ROXAS CITY – Gin-aresto sang mga pulis ang isa ka lalaki nga ginaalegar suspek sa pagpanghimulos sa isa ka barangay kagawad nga babaye sa isa ka banwa sa probinsiya sang Capiz.
Base sa nakuha nga impormasyon sang Bombo Radyo Roxas sa Women and Children Protection’s Desk sang pulisya, isa ka 40 anyos nga barangay kagawad ang wala na ginhingadlan nga biktima nga may live-in partner kag lima ka mga kabataan.
Ang suspek naman ang naga-edad sang 37 anyos.
Mahibaluan nga natabo ang pagpanghimulos sa biktima pasado ala una sang kaagahon sang ginaalegar ginsulod sang suspek ang kwarto sini nga ginaalegar may dala pa nga kutsilyo.
Dugang pa diri, ginaalegar nga pwersahan nga gindala sang suspek sang likod sang balay ang biktima kag diri ginhimo ang pagpanghimulos.
Matapos ang insidente, nagpangayo sang bulig sa mga kapulisan ang biktima rason nga gilayon man nga naaresto ang suspek.
