ROXAS CITY – Kritikal ang 30-anyos nga lalaki matapos nga bumunggo ang ginamaneho nga motorsiklo sa kasugata nga salakyan sa Barangay Quinat-uyan, Maayon, Capiz.
Ginkilala ang napilasan kay Ricardo Banico, kag residente sang Brgy. Indayagan sa nasambit nga banwa.
Samtang ang driver sang salakyan ang ginkilala kay Jaylord Diaz, 41-anyos, residente sang Poblacion Ilaya sa amo man nga banwa.
Sandig sa imbestigasyon sang Maayon MPS, samtang ginasubay ni Diaz ang dalanon padulong sa ila balay sakay sa Mazda Utility nga salakyan sang hinali ini nga nabungguan sang kasugata nga Honda TMX 155 nga motorsiklo nga ginamaneho ni Banico.
Ginapahayag nga madasig ang pagpadalagan ni Banico rason nga nadulaan ini sang kontrol sang manubela kag bumunggo sa nauna nga parte sang salakyan.
Bangud sa natabo patal nga pilas sa ulo ang naangkon ni Banico nga madasig naman nga ginpadangat sa Bailan Dirtrict Hospital para sa nagakaigo nga pagbulong.
Samtang, wala naman napilasan ang driver sang salakyan.
Sa karon, ginkustodiya sang Maayon MPS ang duwa ka mga nadalahig nga behikulo para sa nagakaigo nga disposisyon samtang nagapadayun ang imbestigasyon.
