-- ADVERTISEMENT --

BUNGSUAN, Dumarao, Capiz – Pilason ang isa ka lalaki matapos ang nagluntad nga pagpangbuno sa Barangay Bungsuan, Dumarao, Capiz.

Ang biktima amo si alyas Toto, 23-anyos nga lalaki, samtang ang suspek ginkilala sakay alyas Roy 56-anyos nga lunsay residente sang nasambit nga lugar.

Sa interview sang Bombo Radyo kay Police Lieutenant Russell G Husmalaga, Officer-in-Charge sang Dumarao Municipal Police Station, iya ginpahayag nga nag-ugat ang insidente sa indi pag-intindihanay kag pagbinaisay sang duha antes ginbuno sang suspek ang biktima.

Suno kay Husmalaga, nag-angkon ang biktima sang duha ka igo sang pagbuno sa likod kag isa naman sa atubang nga bahin sang iya lawas, samtang matapos ang insidente, nagpalagyo ang suspek kag tubtob sa karon nagapabilin nga at large.

Pahayag pa niya, yara na sa estable nga kondisyon ang biktima kag padayon nga ginabulong sa isa ka ospital pampubliko nga hospital sa bahin sang Iloilo City

-- ADVERTISEMENT --

Dugang pa sang natungdan, posible nga frustrated homicide ang kaso nga ipasaka batok sa suspek, samtang ginahulat pa sang kapulisan ang desisyon sang pamilya sang biktima sa pagpasaka sang nagakaigo nga kaso.

Sa karon, ginapahanumdom sang Dumarao MPS ang publiko nga palawigon ang pasensya kag likawan ang pagpalala sang mga indi pag-intindihanay agud indi na ini magresulta sa mas seryoso nga insidente.