ROXAS CITY – Nadulaan sang alinto ang isa ka lalaki matapos ginapahayag nabungguan sang salakyan samtang nagatabok sa dalan takna 10:35 sang gab-i Marso 28 sa Barangay Lawaan, Roxas City.
Ginkilala ang biktima kay Moriel Dionesia yara sa legal nga pang-edaron kag residente sang Barangay Bolo, Roxas City, samtang ang ginapahayag suspek ang ginkilala kay Dan Daryl Dorado 28-anyos kag residente sang Sitio Arcabalo, Barangay Bolo, Roxas City.
Sa impormasyon nga nakuha sang Bombo Radyo sa Roxas City PNP, ginpahayag nga samtang ginasubay ni Dorado ang dalan nagikan sa ila lugar kag padulong kun tani Roxas City proper sakay sang ginamaneho nga Mitsubishi Pajero nagaduag puti, aksidente sini nga nabungguan ang biktima nga nagatabok sa dalan.
Bangud sa impact, nalipong si Dionesia nga madasig naman ginrespondihan sang katapo sang Roxas City Emergency Response Team (RCERT) kag ginpadangat sa pribado nga ospital para dapatan sang pagbulong.
Sa karun, yara sa kustodiya sang Roxas City PNP si Dorado subong man ang salakyan para sa nagakaigo nga disposisyon.
