ROXAS CITY – Ginaphayag nagpang-agaw sang bag ang lalaki nga nasapwan-patay sa kilid sang suba nga sakop sang Barangay Dayhagon, Sigma.
Ginkilala ang biktima kay Harry Denosta, 41-anyos kag residente sang Brgy. Ilas Sur, Dao, Capiz.
Mahibaluan nasapwan ang biktima nga nakakulob kag nakahigot ang nasambit nga bag sa iya natuo nga butkon.
Sa interview sang Bombo Radyo kay Barangay Kagawad Azarcon sang Barangay Dayhagon, suno sa iya nabaton nga impormasyon ginrentahan ang sound sytem sang biktima sang piyesta sa Dao sang Setyembre 21 apang gin-akat ini sang iya duwa ka barkada nga magpadulong sa banwa sang Sigma kun sa diin lunsay hubog na ang mga ini.
Wala naman nakapauli ang biktima tubtob Setyembre 22 kag didto na nagpost sa Facebook ang iya mga utod nga nadula siya kag ginapangita.
Ginapahayag residente sang Sara, Iloilo ang isa sini ka barkada nga si Charlie Medina driver sang bakhoe kag nagapanag-iya sang bag nga ginaalegar iya gin-agaw.
Sang ginpamangkot si Medina sang isa sa utod sang biktima kun ano ang natabo, ginsiling sini nga sang yara na sila sa crossing Dayhagon kag mapondo na kuntani ang motorsiklo nga ila ginsakyan sang hinali nalang suno diri ginsabnit sang biktima ang iya bag kag nagdinalagan.
Ginsiling ni Azarcon nga suno naman kay kapitan nabatian man sini nga kasubong may nagadalagan sa maisan kun sa diin malapit ang iya baboyan kag ang suba sang kaaganhon sang Huwebes, pila naman suno diri ka residente ang nagsiling nga nag-agi ang bata sang biktima kag nagapamangkot kun naglabay ang iya amay sa amu nga lugar.
Wala nagapati ang pamilya kag himata ni Denosta nga mang-agaw ini sang bag bangud may dala ini nga kapin P27,000 antes naglakat sa ila balay.
Ahente man ini kun sa diin nagapamakal sang baboy kag carabao, gani imposible suno diri nga buhaton ang ginapasibangud sa iya.
