ROXAS CITY- Ginhilway na sa karsel ang lalaki nga suspek sa pagpangluthang sa isa ka persona nga nasal-an sini nga makawat sang manok sa Barangay Dacuton, Dumarao Capiz.
Sa nangin pahayag ni PCAPT. TOBIAS S. GARFIN, Officer in -Charge sang Dumarao Municipal Police Station sang mainterview sang Bombo Radyo, hilway na ang suspek nga si alyas Ken, 62-anyos, residente sang nasambit nga lugar, matapos nagtakop ang iya reglementary period of detention.
Matandaan nga nag-angkon sang pilas sa tuhod kag kamot ang biktima nga si Alyas Toto, 42-anyos, residente man sang amo nga barangay.
Dugang pa ni Garfin, ginsugo lamang ang biktima sang iya amo nga dakpon ang ginahuptan nga manok apang naglupad ini padulong sa ila tupad balay kun sa diin yara ang puluy-an sang nasambit nga suspek.
Bangud sa pagdumdum nga makawat ang biktima, gilayon ini nga ginluthang sang suspek gamit ang .45 caliber revolver nga armas luthang.
Padayon sa gihapon nga ginadapatan sang nagakaigo nga pagbulong sa Dao District Hospital ang nasambit nga biktima.
Sa karon, natalana na nga pasakaan sang kaso sang Dumarao Municipal Police Station nga Frustrated Homicide ang amo nga suspetsado.
