Isa ka 44-anyos nga lalaki sa Rayong, Thailand ang nasapwan nga patay sa iya nga balay matapos nagkonsumo lamang sa pag-inom sang beer sa sulod sang masobra isa ka bulan.
Ginapatihan nga ang natabo resulta sang pamaagi sang biktima sa pag-atubang sa tuman nga kasubo tuga sang pagbulagay nila sang iya asawa.
Ginkilala ang biktima nga si Thaweesak Namwongsa. Suno sa mga report, nagresponde ang mga rescue worker sadtong nakaligad nga Dominggo matapos makabaton sang tawag nga si Namwongsa ang gin-atake sang seizure kag nadulaan sang alinto.
Apang pag-abot sa lugar, gindeklara ini nga patay na. Ang iya 16-anyos anak nga lalaki ang nakatukib sa iya nga kahimtangan pagpauli sini halin sa eskwelahan.
Masobra 100 ka botelya sang beer nga nakaplastar sa salog sang hiligdaan sang biktima ang nakit-an sang mga otoridad sa balay sang biktima.
Suno sa iya nga himata, adlaw-adlaw niya ini nga ginalutuan sang pagkaon, apang masami ini nga nagapamalibad kag beer lamang ang ginakonsumo sa sulod sang masobra isa ka bulan.
Ginadudahan nga ang pag-inom sang alak ang nangin pamaagi ni Namwongsa agud makalimtan ang kasubo nga iya nabatyagan matapos nagbulagay sila sang iya asawa.
Nagpaandam ang mga eksperto angut sa katalagman sang pagkonsumo sang beer bilang kabaylo sang pagkaon. Apisar manggaranon sa calories, kulang ini sa mga importansiya sang sustansiya nga kinahanglan sang lawas.
Ang sobra nga pagkonsumo sini ang mahimo nga magtuga sang tuman nga “nutrient deficiency” kag halit sa atay ukon “liver damage.”
Ang kamatayon ni Namwongsa nagaserbe nga isa ka masubo nga pahanumdom sa peligro sang paggamit sa alak agud malimtan ang mga problema.
