Ginpakamalaut ni House Assistant Majority Leader kag Lanao del Sur Rep. Zia Alonto Adiong ang kampo ni VP Sara Duterte bangud sa pagtawag sang House hearings nga “kangaroo court,” kadungan sini gingamit nila ang desisyon sang Korte Suprema sang Pilipinas angut sa due process.
Suno kay Adiong, ginapatigayon ang hearing agud sundon ang direktiba sang Korte Suprema agud masiguro ang kinamatarung sang respondent sa preliminary inquiry antes magpadayon sa plenaryo.
Pahayag pa niya, sang nagpaguwa sang desisyon ang Korte Suprema, ila ini gindayaw. Karon nga ginapatuman sang Kamara ang mando sang korte nga maghatag sang nagakaigo nga proseso, ginatawag ini nga “kangaroo court.”
Gin-athag ni Adiong nga ang proseso ang nasanto sa ginsulat ni Associate Justice Marvic Leonen nga naga-require sa Kamara nga mangin mahinalungon sa pagtuman sang Konstitusyon.
Ginpanindugan sini nga indi dapat mangin “selective” ukon pilion ang kampo ni VP Duterte nga respetuhon ang mando sang Konstitusyon base lamang sa kun ano ang pabor sa ila.
