Ginalantaw sang isa ka legal expert nga yara sa kamot sang International Criminal Court (ICC) Prosecution ang gahom agud mapamatud-an nga may probable cause ang mga ebidensya sa crimes against humanity ni Former President Rodrigo Duterte agud mapadayon ang kaso sa full trial.
Sa interview sang Bombo Radyo kay Atty. Rodel Taton, Dean ng Graduate School of Law ng San Sebastian College-Recoletos sa Manila, iya ginpahayag nga magapadayon karon ang ika-tatlo na nga confirmation of charges hearing batuk kay Duterte sa ICC.
Katuyoan sang hearing nga matumod kun may bastante nga basehan ukon substantial grounds agud nga padayunon ang kaso sa full trial.
Suno kay Atty. Taton, sa sulod sang duha ka adlaw sang confirmation of charges, plastado nga ginpakita sang prosecution ang ila nga ebidensya agud pamatud-an ang mga alegasyon.
Maathag nga ginpresentar sang prosecution ang sistematiko kag lapnagon nga pag-atake sa idalom sang Davao Death Squad sang alkalde pa lang si Duterte tubtob nga gin-adopt niya ini sang siya ang nangin presidente.
Apang sa nangin obserbasyon sini, daw may yara sang political framing ang defense team nga wala na naga-focus sa ICC kundi sa opinion sang publiko particular sa supporters ni Duterte nga daw kaangay nga luyag sang depensa nga makakuha sang simpatiya sa mga tagasuporta.
Sa pagpadayon naman sang hearing, ginalauman ni Taton nga padayon man nga kwestyunon sang depensa ang hurisdiksyon sang International Criminal Court.
