ROXAS CITY – Desidido ang live-in partner sang nakapalagyo nga subject person sang ginpatigayon nga drug buybust operation sa Sitio Pagutok, Barangay Milibili, Roxas City nga magpasaka sang panumbungon sa mga katapu sang raiding team.
Ginpahayag ni Juvy Apolinario, live-in partner ni Jun Laserna nga ginkakibot sini sang hinali nagsulod ang mga katapu sang Philippine Drug Enforcement Agency (PDEA) kag mga pulis sa ila balay kag ginpangita ang iya partner.
Gin-alegar man sang ginang nga nagkaladula ang pila nila ka mga gamit sang ginsulod sang mga pulis.
Kalakip sa mga nadula ang electric shaver, cash nga P1,300 kag cellphone.
Ginpahayag sang ginang nga nagpadulong sila sa Roxas City PNP agud ipa-blotter ang pagsulod sang mga pulis sa ila balay kag ang pagkaladula sang mga gamit.
Apang tatlo pa ka adlaw antes nila nakuha ang blotter report sa diin sang ila gindala sa Capiz Police Provincial Office, gintudlo sila sa Provincial Internal Affairs Service (PIAS).
Ginpangitaan sila sang witness nga magasuporta sa ila alegasyon, apang wala sang bisan isa sa ila kaingud balay ang maga-witness, posible sa pagkabalaka nga madalahig sa insedente.
Sa karon nagalibog ang ulo sang ginang kun ano ang ila himoon agud mahatagan sang hustisya ang ila nadangatan.
