Sa pihak sang lamharon nga edad nga 25-anyos, ginpagkit na ni Dallas superstar Luka Doncic ang iya ika-siyam nga 40-point triple-double sa nangin kadalag-an sang Dallas Mavericks batuk sa Golden State Warriors.
Naghimo ang ginakabig LukaMagic sang 45 points, 11 rebounds, kag 13 assists, nga nangin rason agud mabulsa sang Mavs ang ika-17 nga daog subong nga season.
Anom nga 3-pointer ang napasulod ni Luka gikan sa 11 attempts, kalakip ang pito nga free throws.
Daku nga bulig man ang presensiya sang anay Warriors guard nga si Klay Thompson nga nagpasulod sang pito nga 3-pointers gikan sa 11 nga tira.
Sa Warriors, wala nakasalir ang 26 points kag pulo nga assists nga nahimo sang superstar nga si Stephen Curry, kalakip ang 29 points nga amot ni Andrew Wiggins.
Mangin ang 21 points sang defensive specialist nga si Draymond Green ang indi man bastante para salbaron ang Warriors gikan sa ika-11 nga pagkapiyerde nila subong nga season.
Pareho nga nalista sang duha ka hubon ang masobra 50% nga 3-pt percentage kun sa diin 27 3-pointers ang ginpasulod sang GSW samtang 21 naman ang nahimo sang Mavs sa kabug-usan sang hampang.
Sa pihak sini, nabudlayan ang Warriors sa madamo nga free throw nga gingawad sa Dallas. Mahibaluan nga naglab-ot sa 25 calls ang ginhatag sa Mavs samtang 11 lamang ang gintawag sa GSW.
Ang gin-combine nga 48 3-pointer nga napasulod sang duha ka team ang panibag-o nga record sa NBA bilang pinakamadamo nga 3-pointer nga napasulod sang magkasumpong nga team sa kasaysayan sang liga.
Gikan sa 48 tres, 18 diri ang napasulod sang Warriors sa una nga half sang hampang.
