PRESIDENT ROXAS, CAPIZ- Arestado ang mag live-in partner matapos nga nakuhaan sang ginapatihan shabu sa ginpatigayon nga Search Warrant Operation sa Barangay Poblacion, President Roxas, Capiz.
Ang nagkaladakpan amo sanday alyas ‘Rodgito’ 40-anyos, kag alyas ‘Myra’, 40-anyos nga lunsay residente sang nasambit nga lugar.
Sa impormasyon nga nakuha sang Bombo Radyo nagikan sa President Municipal Police Station, ginpahayag nga natigayon nga maaresto ang nasambit nga mga indibidwal pinaagi sa gintingub nga pwersa sang mga katapo sang President Roxas Municipal Police Station kag 2nd Maneuver Platoon sang 1st Capiz Police Mobile Force Company.
Nakuha sa paghinakop sang mga ini ang syam (9) ka dalagkuan nga heat sealed transparent sachet sang ginapatihan shabu nga ginabulubanta nagabug-at sang 40 gramos nga may balor nga mas ukon menos P272,000, lima (5) ka mga lighters, isa (1) ka dako nga rolyo sang aluminium foil, isa (1) ka gunting, tatlo (3) ka improvised tooter, isa (1) ka digital weighing scale kag tatlo ka bundle sang empty plastic sachet.
Nagapangatubang ang mga ini sa karon sa kaso sa paglapas sa Republic Act 9165 ukon ‘Comprehensive Dangerous Drugs Act of 2002’.
Sa karon, nagapabilin ang mga ini sa kustodiya sang President Roxas Municipal Police Station para sa nagakaigo nga disposisyon.
With a report from Bombo Jessa Mae De Los Santos
