PRESIDENT ROXAS, CAPIZ – Boluntaryo nga nagsungka sa mga otoridad ang magpakaisa nga suspek sa pagluthang-patay sa isa ka barangay tanod sa Barangay Manoling, President Roxas, Capiz.
Ginkilala ang biktima nga si Jerry Abendano, 27 anyos kag residente sang nasambit man nga barangay.
Ang mga suspek ang ginkilala nga sanday Gabriel Batan kag Elohilo Batan sang amo man nga lugar.
Mahibaluan nga nagsungka ang mga suspek kay Vice Mayor Edvil John Alfaro nga amo naman ang nagdala sa ila sa mga kapulisan.
Base sa nakuha nga impormasyon sang Bombo Radyo, ginsaway sang biktima ang mga suspek bangud sa magahod nga videoke.
Sa baylo nga magsunod, ginkaakig sang mga suspek ang pagsita sa ila rason nga nagbaisay ang magtimbang nga bahin.
Bangud sang kaakig, ginluthang sang mga suspek ang biktima nga naigu sa dughan.
Ginapahayag nga lunsay yara sa idalom sang impluwensiya sang makahulubog nga ilimnon ang mga suspek sang natabo ang nasambit nga insidente.
