Padayon nga mabatyagan ang mainit nga panahon nga may gamay nga tiyansa sang pag-ulan sa mga masunod nga duha tubtob tatlo ka adlaw.
Suno kay state weather specialist Loriedin dela Cruz-Galicia, apisar makaeksperyensya sang makanay nga kalangitan sa kadam-an nga mga lugar sa Luzon kag Visayas, magaapekto naman sa pila ka parte sang Mindanao partikular na sa nabagatnan nga bahin sini ang Intertropical Convergence Zone (ITCZ).
Ginalauman nga magadala ini sang light to moderate rain showers sa Zamboanga del Sur, Zamboanga Sibugay, Davao Oriental, Davao Occidental, Sarangani, Basilan, Sulu kag Tawi-Tawi sa masunod nga 24 oras.
Mabatyagan naman sa nabilin nga parte sang Mindanao sang medyo magal-umon tubtob sa magal-umon nga kalangitan nga may kaupod nga localized rain showers.
Samtang, wala naman sang lapnagon nga pag-ulan ukon localized thunderstorms ang ginalauman sa Luzon kag Visayas bangud sa nagaapekto nga easterlies.
Base man sa forecast, masobra 20 ka lugar ang posible nga maka-record sang heat index nga yara sa danger category nga nagadangat halin 42 degrees Celsius tubtob 51 degrees Celsius sa masunod nga duha ka adlaw.
