Ginpasalig sang Malacañang nga handa ang gobyerno sa anuman nga pagtinguha nga pahalinon si Presidente Ferdinand R. Marcos Jr., sa tunga sang nagalapta nga mga report tuhoy sa ginaalegar coup plan ukon destabilization efforts batok sa administrasyon.
Suno kay Presidential Communications Office (PCO) kag Palace Press Officer Undersecretary Claire Castro, handa ang gobyerno nga atubangon ang anuman nga lihok nga nagatuyo nga gub-on ang katawhay kag seguridad sang pungsod.
Dugang pa ni Castro, nakahanda ang mga natungdan nga ahensya sa pagpasiguro sang kalig-on sang gobyerno kag wala sang rason nga magkabalaka ang publiko.
Nagpanawagan man ang opisyal sa publiko nga indi magpatalang sa mga nagapalapta sang indi matuod nga impormasyon kag i-verify anay ang balita antes magpati ukon i-share sa social media.
Ang pahayag ni Castro ang sabat sa nagatuhaw nga espekulasyon nga posible liwaton sang Pilipinas ang sitwasyon nga natabo sa Myanmar, sa diin may yara sang kudeta batok sa gobyerno.
Ginapanindugan man sang Palasyo nga mabaskog ang administrasyon ni Presidente Marcos Jr. kag nagapabilin ini nga komitido sa pagpadayon sang mga programa para sa kalinong, pag-uswag, kag kalig-on sang pungsod Pilipinas.
