ROXAS CITY – Pilas sa nawala nga kamot kag tiyan ang naangkon sang 46-anyos nga magulang matapos nga ginlabo sang iya 42-anyos nga manghod, sa Barangay Timpas, Panit-an, Capiz.
Ginkilala ang biktima kay Julius Buday Jr., kag mamumugon.
Samtang, ang manghod nga suspek amu si Rodel Buday, lunsay mga residente sang nasambit nga barangay.
Sandig sa inisyal nga imbestigasyon sang mga katapo sang Panit-an MPS, alas-9:30 kagab-i sang Domingo, Hunyo 12, yara sa ila puloy-an ang biktima kaupod ang ila Iloy nga si Margarita Buday, 72-anyos, hinali nalang nga nag-abot ang manghod kag nag-angkon sang argumento sa tunga sang mag-utod, apang natigayon nga matambagan sang ila Iloy.
Nagpauli ang manghod sa iya balay apang nagbalik sa balay sang iya magulang nga may bitbit na nga hinganiban kag ginlabo ang biktima.
Gilayon ginpadangat sang mga katapo sang Panit-an MDRRMO ang biktima sa pinakamalapit nga ospital.
Samtang ang suspek ginpahayag nga nalagyo.
Nahibaluan nga lunsay yara sa impluwensiya sang makahulubog nga ilimnon ang mag-utod kag posible daan nga hiligut-anon ang motibo sa insidente.
