ROXAS CITY – Luwas nganakabalik sa iya pamilya sa Barangay Culasi, Roxas City ang isa ka mangingisda matapos nagkulob ang bangka sa tunga sang lawud. .
Ginkilala ang biktima nga si Dante Balugal 40-anyos sang Sityo Luyo, Barangay Culasi, Roxas City.
Sa interview sang Bombo Radyo kay Balugal, ginpahayag sini nga magadul-ong kuntani ini sang gasolina sa isa ka bangka sa lawud sang hinali nga mag-ulan sang mabaskog kasunod ang paghampak sang daku nga balud nga gintunaan sang pagkulob sang iya nga bangka.
Apang suno sa biktima nga antes ang paghampak sang daku nga balud, may nakita ini nga buhawi sa isa ka bahin sang kadagatan nga malapit sa iya bangka.
Gintuyo pa sini nga magbalik, apang hinali nga nabatyagan ang mabaskog nga hangin kasunod ang daku nga balud nga amo ang nagpakulob sa iya nga bangka.
Nagpalutaw lutaw si Balugal sa sulod sang tatlo ka oras antes may nakakita sa iya nga bangka nga nagbulig sa iya.
Nahibaluan nga ginhigtan sang biktima sang pisi ang hawak agud indi ini madala sa mabaskog nga balud.
