Isa ka 38-anyos nga manugpakot sa Pattaya, Thailand, ang ginkulong pagkatapos nga gin-aresto bangud sa pagpangawat sang iPhone 13 Pro sang iya 19-anyos nga kliyente sa Adlaw sang Bag-ong Tuig.
Suno sa report sang kapulisan, ginpaandaman sang suspek ang biktima nga si “Pim,” nga pakamalauton kag madulaan sang malahalon nga mga butang kun indi magbayad sang dugang nga balayran para sa anti-bad luck ritual.
Sang nagpamalibad ang dalagita nga magbayad sang dugang nga balayran, ginkuha sang manugpakot ang cell phone nga nahulog sa lamesa samtang ginapatigayon ang pagpakot.
Sang nagbalik ang biktima kag ginkomprontar ang manugpakot, gintuyo pa sang suspek nga ipanghiwala ang pagpangawat kag manipulahon ang biktima paagi sa pag-gaslight kag pagpanindugan nga ang pagkadula sang cell phone pamatuod nga natuman ang prediksyon.
Naghimo-himo pa sang istorya ang suspek kag naghatag sang deskripsyon sa hitsura sang “kawatan” nga ginapahayag nakita niya sa iya panan-awan.
Apang wala nagpati ang biktima kag nagpangayo sang bulig sa mga tawo sa iya palibot kag sa kapulisan.
Sa pagpangita, natukiban ang modus sang manugpakot sang nakita ang nadula nga iPhone sa iya bag. Sa ulihi, gin-ako sang suspek nga ginhimo niya lamang ini bangud kinahanglan niya sang kwarta para sa bag-ong tuig.
Gindakop kag ginpasakaan sang kaso ang suspek kag ginkumpiskar ang tanan sini nga gamit sa pagpakot.
