Isa ka manunudlo ang ginluthang sang iya anay bana sa sulod sang hulot-klasehan samtang nagapreparar nga magtudlo sa Tanauan, Leyte.
Base sa impormasyon gikan sa Police Regional Office (PRO 8), natabo ang insidente sa Tanauan School of Craftsmanship and Home Industries sa Barangay Canramos las 7:23 sang aga.
Base sa imbestigasyon sang kapulisan, yara na sa sulod sang eskwelahan ang 48-anyos nga biktima sang nag-abot ang suspek kag hinali nga ginluthang ang manunudlo nga naigo sa abaga.
Pagkatapos sang pagpangluthang, ginhaboy sang suspek ang pusil sa atop.
Gindala naman sa ospital sang mga kaupod sa eskwelahan ang biktima.
Pag-abot sang mga pulis, ila naabtan ang suspek nga may gina-uyatan nga kutsilyo kag ginaalegar plano nga sakiton ang iya kaugalingon.
Apang, ginkumbinsi nila siya nga magsungka.
Narekober sang mga pulis sa lugar sang krimen ang .38 caliber shotgun nga gingamit sang suspek sa pagpangluthang, kag ang kutsilyo.
Apisar nga nagbulagay na ang duha, nagbatyag sa gihapon sang kahisa ang suspek sang nahibaluan nga may bag-o na nga relasyon ang biktima.
