ROXAS CITY – Masobra 3 milyones pesos nga balor sang shabu ang mga narekober sang mga kapulisan sa probinsya sang Capiz sa mga ginpatigayon nga drug operations sang tuig 2019.
Sandig sa datos sang Capiz Police Provincial Office (CPPO) sang nagligad nga tuig 2019, 77 tanan ka mga operasyon ang ginkasa sang mga kapulisan sa probinsya sa diin 113 ka mga drug suspects ang naaresto sang mga kapulisan kag 186 ka mga persona ang napasakaan sang panumbungon.
Nagapanguna sa may pinakamadamo nga operasyon ang Roxas City Police Station nga may yara sang 27 ka mga operasyon sa diin 44 ang naaresto nga mga drug suspects.
27 ka mga operasyon naman ang ginkasa sang Provincial Drug Enforcement Unit (PDEU) sa diin 42 ka mga drug suspects ang lunsay nagkaladakpan.
Samtang naglabot naman sa 296 ka gramos sang shabu ang narekober sang mga kapulisan sa diin naglab-ot sa kabug-osan nga P3,552,002 ang market value sandig sa Dangerous Drugs Board.
