ROXAS CITY-Nagnegatibo sa Rapid Anti-Body test ang masobra 30 ka mga administrative staffs kalakip na ang mga pila ka mga miyembro sang Sangguniang Panlalawigan.
Ini ang ginkompirmar ni Vice Governor Jaime Mitang Magbanua sang mainterview sang Bombo Radyo.
Ginpahayag ni Magbanua nga ginpakamaayo sini nga ipaidalom sa Rapid Anti-body test ang mga staff kalakip na ang mga miyembro sang konseho, agud mapasiguro nga hilway sila sa virus.
Suno sa kay Magbanua nga kadamuan sa mga Board Members ang ginpaidalom sa test kahapon nga adlaw magluwas gid lamang sa 4 ka mga Board Members nga wala nakaipadalom sa test nga ginakalakipan nanday Board Member Eleuper Martinez nga madugay na nga na-stranded sa Metro Manila, Board Member Ricky Martin, Board Member Karen Palomar kag SK Federation President Renzo Teves.
Apang gin-athag ni Magbanua nga ginhinyo sini nga ipaidalom sa guihapon sa rapid test ang mga board members nga wala naka pa test magluwas gid lamang kay Martinez.
Gin-athag naman ni Magbanua nga wala sang mga board members nga naka close contact sa gobernador kag wala man sang may ginapaidalom sa quarantine.
Gindugang ni Magbanua nga ginhimo ini nga tikang sang Sangguniang Panlalawigan agud mapasiguro nga hilway sa virus ang bug-os nga konseho sa maabot nila nga session sa madasun nga semana.
Samtang ginkompirmar man sini nga may yara sang duha ka mga staff sini nga natalana ipaidalom sa Real-Time Polymerase Chain Reaction ukon RT-PCR test matapos nga ginapahayag naka close contact si Capiz Governor Esteban Contreras.
