GENERAL SANTOS CITY- Nakumpiska sang Bureau of Fisheries and Aquatic Resources–SOCCSKSARGEN (BFAR-12) ang masobra 40 ka mga buhi nga piranha halin sa isa ka bagahe sa public terminal sa General Santos City sang Nobyembre 25, 2025. Nadiskubrehan ang 43 ka pares sang ginadumili-an nga isda nga nakasulod sa mga plastic bag matapos ang routine inspection.
Suno sa BFAR, ginapahayag nabakal online ang mga piranha sang pila ka mga pet keepers halin sa isa ka manugbaligya sa Cagayan de Oro City. Isa sa mga nagbakal amo ang isa ka 16-anyos nga solterito nga nagbayad sang ₱2,000 para sa 10 ka bilog. Wala ini ginpreso apang ginpahunumduman lang upod ang iya nga mga ginikanan.
Nagpahunumdom ang BFAR nga hugot nga ginadumili-an ang pagpasulod, pagbaligya, kag pag-ataman sang piranha sa pungsod umpisa pa sang 1979 kag may nagakaigo nga multa nga mahimo maglab-ot sa ₱5 million sa idalom sang Fisheries Code. Kilala ang piranha bilang highly invasive species nga mahimo makahalit sa mga katubigan kun makabuhi.
Nagpatigayon na sang koordinasyon ang BFAR-12 kag BFAR-10 agud matultulan ang nagabaligya, samtang gindala ang mga nakumpiska nga piranha sa BFAR Central Office para sa pagpangusisa.
