Gin-report sang Department of Health (DOH) ang pagtaas sang numero sang mga Kanlaon evacuees nga nakaeksperyensya sang mga respiratory infection sumugod sang ginmandu sang gobyerno ang lapnagon nga evacuation.
Suno sa DOH – Negros Island Region, naglab-ot na sa 74 nga evacuees ang nag-angkon sang nagkalain-lain nga respiratory infection sumugod sadtong ginpatigayon ang forced evacuation.
Yara sa kabug-usan nga 71 ka indibidwal ang nag-angkon sang nagkalain-lain pa nga sakit.
Suno sa DOH, may kabug-usan nga 77 medical personnel nga naka-deploy sa 32 evacuation center sa mga lugar nga apektado.
Natukiban sang mga medical personnel ang mataas nga numero sang mga nagmasakit kadungan sang regular nga check-up kag lapnagon nga health surveillance.
Nagapanguna nga ginabantayan sang mga ini ang mga evacuation center sa La Castellana, Bago City, La Carlota City, kag San Carlos City sa Negros Occidental kag Canlaon sa Negros Oriental.
Ginsiguro naman sang DOH ang padayon nga pagpaguwa sang mga bulong kag iban pa nga medical supplies sa mga evacuation center agud magamit sang mga nagamasakit nga evacuees.
Suno sa DOH, nakapanagtag na ang mga ini sang kabug-usan nga 135,329 assorted medicines, 87,200 N15 masks kag 48,500 face masks, 17,000 aquatabs, 349 nebulizer kits kag linibo nga surgical gloves and goggles, sumugod sang liwat nga naglupok ang bulkan sa una nga bahin sang Disyembre.
