Magapabilin nga mataas ang presyo sang kamatis subong nga tion sang tig-ululan sa pungsod suno sa Philippine Chamber of Agriculture and Food, Inc. (PCAFI).
Pahayag ni PCAFI president Danilo Fausto, sa naeksperyensyahan nga pag-ulan, apektado ang pagtubo sang kamatis kasubong man sang iban nga mga ulutanon rason nga apektado man pati ang presyo sang mga ini.
Nagpanawagan man ini sa Department of Agriculture (DA) nga kun tani hatagan na sang nagakaigo nga solusyon ang mga kakulangan sang post-harvest facilities agud masiguro nga ma-preserve ang kamatis kun mag-abot na ang peak harvest season.
Gin-suhestyon man sini ang iban nga mga pagproseso sang nasambit nga produkto kasubong sang tomato paste kag tomato sauce.
Matandaan, sang damlag lang baliskad ang nangin pahayag sang DA bangud ginpahayag sini nga maganubo na ang presyo sang kamatis sa makaligad ang duha ka semana kag magabalik na sa nauna nga presyo sini nga nagadalagan sa P80 ang kada kilo.
Nahibaluan nga sa pagmonitor sang presyo sa pila ka mga merkado sa pungsod, nagdangat na ang presyo sini sa balor nga P130 tubtub P200 kada kilo.
Nagpasalig man ang ahensya nga lantawon sang mga ini nga kun may mga retailers sang nasambit nga produkto ang nagapatuman sang overpricing.
