ROXAS CITY – Ginareklamo ang isa ka lolo matapos nga ginaalegar ginmolestiya ang isa ka menor de edad nga babayi sa Sitio Nipa, Barangay Culasi, sini nga syudad.
Ginkilala ang ginareklamo kay alyas ‘Lando’ pamilyado kag residente sang amu nga barangay.
Sa interview sang Bombo Radyo kay alyas ‘Inday’ kaupod sang biktima nga si alyas ‘Nene’, ginpahayag sini nga samtang nagalakat ang mga ini agud magbakal sang isda kaupod ang duha pa nila ka abyan nga babayi, sang yara sa likod nila si ‘Lando’ nga nagasunod sa ila.
Dugang pa ni ‘Inday’ nga nagtiaw si ‘Nene’ nga nahulog ang iya ID, apang nagsaligbat si ‘Lando’ nga daw kaangay kun kinatawo ni ‘Nene’ ang mahulog iya ini nga puluton kag hikapon.
Wala lang ini ginsapak sang mga kababainhan kag nagpadayon sa paglakat apang nadiparahan ni ‘Inday’ nga indi na nila upod si ‘Nene’, kag sang ulihi, nakit-an nila sa pader sang isa ka shipping lines nga nagahibi na ang amu nga bata apang wala ini nagsugid sang natabo.
Apang sa pag-usisa sang guardian ni ‘Nene’ diri kag nag-aku ini nga ginbutong ini ni ‘Lando’ kag ginpilit nga ipahuba ang iya pang-idalom nga panapton kag ginkuot ang iya pribado nga parte sang lawas.
Natigayon nga makapalagyo suno diri si ‘Nene’ matapos nga ginwakli sini ang kamot sang tigulang kag nagdalagan.
Ginpatawgan gilayon sang guardian sang opisyal ang amu nga tigulang kag gindala sa mga kapulisan.
Ginpanginwala pa sang tigulang ang hitabo sa atubang sang mga opisyal sang barangay apang sang ulihi gin-aku niya ang nasambit nga pagpangmolestiya sa mga kapulisan.
Suno kay ‘Inday’ desidido ang pamilya ni ‘Nene’ nga ireklamo ang nasambit nga suspek.
Nahibaluan nga yara sa impluwensiya sang makahulubog nga ilimnon ang suspek.
