ROXAS CITY – Wala sang pagpang-abuso nga natabo sa ginpatigayon nga pagresponde sang mga pulis sa London, kun sa diin natiruhan-patay ang mga ido nga sanday Millions kag Marshall, ba-se sa ginpaguwa nga pahayag sang tagpamaba sang Metropolitan Police Office.
Ini ang ginpahayag ni Bombo International Correspondent (BINC) Roland Crispo, direkta sa London, sang mainterview sang Bombo Radyo.
Suno diri, ba-se sa kuha nga body cameras kag CCTV footage, wala sang ginlapas sa pamaagi sang pagresponde ang nasambit nga mga pulis.
Klaro man suno diri nga ‘sliced’ videos ukon bahin lamang ni Louie Turnbull, tag-iya sang mga ido, ang nagalapta karon sa social media, indi ang kabug-osan nga video kun sa diin makit-an suno sa mga pulis nga nakignegosasyon pa ang mga ini apang ginaalegar nga wala nag-ugyon si Turnbull, sa baylo, ginpalugaan sini ang higot sang mga ido rason nga nangin ‘uncontrolled’ na ang mga sapat.
Matandaan nga nag-ugat ang pagresponde sang mga pulis bangud sa nauna nga report sang isa ka babayi nga ginaalegar diyutayan ini nga gin-atake sang nasambit nga mga ido.
Sa karon, gin-detain ang tag-iya sang mga ido bangud sa paglapas sa Dangerous Dogs Act of 1991, nga isa ka makabig public threat sa London.
Samtang, may ginapalapta man sa karon nga petisyon sa nasambit nga lugar agud mapasabat man ang mga pulis sa pagluthang-patay sanday Millions kag Marshall.
