Ginapangayuan sang paathag ni Justice Secretary Jesus Crispin Remulla ang mga agent sang Bureau of Immigrations (BI) kag National Bureau of Investigation (NBI) nga nakig-selfie sa anay alkalde sang Bamban, Tarlac nga si Alice Guo.
Suno kay Department of Justice Assistant Secretary and spokesperson Mico Clavano IV, nga ila na gin-abisuhan ang mga yara sa laragway kaupod ang kontrobersiyal nga anay mayor.
Ginpasiguro man ni Clavano nga magaagi sa insakto nga proseso ang tanan kun makuha na nila ang paathag.
Matandaan nga gin-ulan sang pagpakamalaot ang nagalapta nga laragway nga nakig-selfie pa ang mga ahente sang NBI kag BI kaupod si Guo nga nagayuhom pa.
Una na nga ginpahayag ni NBI Director Jaime Santiago nga ang nasambit nga laragway ang nagapamatuod nga nangin madinlag-on ang ila nga operasyon sa Jakarta, Indonesia.
